ALCALDÍA

O Goberno require un informe sobre a tramitación administrativa do expediente da Sala Malatesta

23/03/2017 O executivo local quere aclarar a cronoloxía do expediente. Así mesmo, para evitar accesos aos expedientes sen supervisión técnica, realizarase unha auditoría sobre as consultas.

O Goberno local vén de solicitar ao servizo de Licenzas e Disciplina Urbanística un informe completo sobre o expediente da Sala Malatesta e a cronoloxía da súa tramitación administrativa, así como información sobre as consultas que se fixeron deses documentos. O obxectivo é aclarar por que a inspección técnica deste establecemento se demorou once meses desde a autorización do inicio da actividade e cando o prazo establecido habitual debería ser de tres meses.

O documento que autorizaba o inicio da actividade da Sala Malatesta foi emitido o 16 de novembro de 2015, pero ata o 20 de outubro de 2016 o inspector municipal non emitiu o informe no que poñía de manifesto que non conseguira realizar a inspección da sala posto que non puidera contactar nin co arquitecto nin cos propietarios do local. No mesmo informe o funcionario municipal urxía á limitación provisional do aforo do local a cen persoas.

O 22 de decembro o concelleiro Xan Duro foi informado da situación da Sala Malatesta. Ese mesmo día asinou o decreto que limita provisionalmente o aforo do local, e que días despois a Policía Local entregou aos donos. Na notificación tamén se citaba aos propietarios do establecemento para a realización da pertinente inspección, o 13 de xaneiro. Despois da inspección o expediente seguiu o seu curso habitual, sendo incorporado un novo informe do inspector, relatando a inspección, e tamén un informe xurídico que se engadiu en febreiro. Finalmente a notificación á propiedade foi feita a mediados de marzo.

Consulta de expedientes sen supervisión técnica
Ao tempo que se realiza ese informe interno, o Goberno local iniciou tamén unha auditoría para coñecer que persoas e en que circunstancias puideron consultar o expediente da Sala Malatesta. O executivo lembra que estes accesos deben ser solicitados a través do Rexistro do Concello e supervisados despois por un técnico municipal.

Todos os membros da corporación teñen dereito a consultar os expedientes municipais pero sempre cumprindo os requisitos legais. A regulación do accesos aos expedientes é fundamental para garantir que non se producen alteración e que non se vulnera a lei de protección de datos e o dereito á privacidade da cidadanía

Compartir: