Turismo de Santiago - Incolsa é a empresa municipal creada en 1999 polo Concello de Santiago para atender as necesidades de promoción da cidade do Apóstol, especialmente no sector turístico.

Na tarefa de definir a imaxe da cidade ante habitantes e visitantes, Turismo de Santiago trata de manter un diálogo permanente cos representantes do sector turístico na cidade e con outras institucións de promoción turística españois, como o Grupo de Cidades Patrimonio da Humanidade, o grupo España Verde, Turgalicia e Turespaña.

Turismo de Santiago dispón de dúas oficinas de información turística abertas todo o ano na rúa do Vilar e Praza de Galicia, e tres máis abertas en temporada alta, na Dársena de autobuses de Xoán XXIII, en San Lázaro e no aeroporto de Lavacolla.

A instalación de puntos de información multimedia (PIM), na Estación de Autobuses, en Renfe, no Pazo de Congresos, no aeroporto e na Dársena de Xoán XXIII permitiu, a partir de 2004, atender consultas as 24 horas do día. Ademais, desde estes puntos pódese consultar a páxina oficial de turismo da cidade www.santiagoturismo.com, que dispón de información turística e cultural de Santiago, un tour virtual con fotografías en 360º, cámaras web, vídeos, galerías de fotos para envío de postais, rutas turísticas, monumentos, un plano descargábel, buscadores de aloxamentos, restaurantes e tendas, etc.

A información complétase con publicacións propias, entre as que destacan un folleto xeral sobre a cidade e outros específicos sobre arquitectura, parques e xardíns e turismo idiomático e relixioso.

Novos servizos turísticos

Outra das actividades clave para Incolsa é a creación de novos productos e servizos turísticos, moitos deles encadrados no Plan de Excelencia Turística, que foi xestionado durante tres anos (2001-2004) por Turismo de Santiago.

Neste marco creáronse o Santiago de Compostela Convention Bureau, que funciona como elemento integrador da oferta pública e privada da cidade para viaxes e reunións de negocios, polo que traballa na promoción de Santiago como destino turístico de congresos, e a Santiago de Compostela Film Commission, a oficina de apoio á produción cinematográfica en Santiago, creada no marco de traballo da rede de Cidades de Cine.

Encárgase de asesorar e apoiar largometraxes, documentais, series e programas de televisión ou anuncios, por entendelos como un xeito de promoción da cidade.



Compartir: